Zela 17 in Plaffeien

 Jubla auf Zeitreise 

Und scho ischs widr vrbii. S Highlight vom Jubla-Joor, s’Zela isch umme und mir luege uf e tolls Lager zrugg.

Am Aafang heimer dr Profässer Zweistein und sini Ghilfin Dreimalklug troffe und si hei eus denn mitgnoo um d Ziite widr in die richtig Reihefolg zbringe.

Bide Steiziitbewohner heimer gege Säbelzahntiger müesse kämpfe, mir hei d Amerikaner und d Russe widr vreint, mitem Chines gege e böse Drache kämpft, bi dä Ägypter durch e gruusligi Pyramide müesse, em Caesar Esse kocht, demonstriert gege strengi Fabrikarbet und em Hippie d Farbe widr zruggbrocht. Zum in die vrschidene Ziite zreise heimer Artefakt brucht, damit mer se nochher an dr Ziitstrahl het chönne hänke. Natürlich hei mir zum Reise au es Ritual und e Ziitmaschine brucht. Fascht jede Obe heimer e Rauchbombe abgloo und si denn in d Ziitmaschine ghüpft. Dört inne hets zwar immer chli Zwüschekomplikatione gee, sigs chlemmendi Gstalte, e Kantinaband, e Zauberin, chlöpfendi Ballön, e Stuardess, e Polognese oder e zemegheiendi Ziitmaschine. Sogar dr Professor isch einisch vo dr Ziitpolizei iigsperrt worde willmer zvill greist sind. Aber mir hei schlussendlich dr Ziitstrahl chönne vrvollständige und Gschicht chronologisch iiordne.

Dr Wind het eus au mengisch schwirigi Ziite bereitet aber dr villi Sunneschiin het s gruusige Wetter doch übertrumpft. Gnueg warm ischs denn au gsi zum im Fluss e früschi Abchüelig chönne go nee.

Nach 15 Dääg Sunne, Räge, Schweiss, Sport, Zältle und Spass simmer alli müed aber glücklich heime gange und hei zerscht moll e richtig schöni Duschi chönne nee und uf es paar supertolli Moment zruggblicke.

Es isch es mega cools Lager gsi mit euch und mir gsehnd eus hoffentlich alli am 16.9. zu dr Diashow!!

Mir freue eus scho jez ufs negschte Zältlager!!

 

Eueres Jubla-Leiterteam

 

Folg uns auf sozialen Netzwerken!

  • Facebook - White Circle
  • Instagram - White Circle

© 2019 Jubla Gelterkinden